【講開有段故】越王勾踐滅吳後 越國點解又會消失？
越王勾踐臥薪嚐膽滅吳後，其實就已經成為春秋戰國嘅一方霸主，鼎盛之時疆域僅次於楚國，東達東海，西連楚國，南接百越，北鄰齊魯。明明都已經盛極一時，點解一個咁樣嘅大國又會忽然衰落消失呢？今次阿史就同大家講一講啦！
要解答呢個越國衰落之謎，其實就要由幾方面入手，首當其衝就一定係同人才有關！要知道越王勾踐之所以可以成功復仇，係離唔開文種、范蠡呢兩個人才。之不過喺佢成功復仇之後，勾踐先係賜死文種，而范蠡急流勇退之下先至可以逃過一刧。呢兩件事亦都令天下嘅人才明白勾踐嘅為人，而且越國本身地理位置就偏離中原，就更加冇人才願意投奔。
而喺越王勾踐之後，越國內亂頻繁發生，甚至仲發生「越人三弒其君」、「諸咎之亂」嘅情況，弒父篡位都曾經發生。喺君主整體水平日益下降嘅情況下，越國就更加難有發展嘅空間。
而去到戰國時期越國最後一位君主越王無彊即位後，喺原本打算攻打齊國嘅情況下反被齊國遊說攻打楚國，結果就大敗越軍，越王無彊慘被殺死。曾經嘅春秋霸主亦被楚國佔領。
原圖嚟自網絡